CEBU CITY-Mopadala ang Land Transportation Office (LTO)-7 og communication letter ngadto sa tagsa-tagsa ka mga local government units aron ipahinumdom nga dili gamiton ang mga trak isip transportasyon sa mga tawo.
Giklaro sa Regional Director sa Rehiyon-7 nga si Victor Caindec nga pinasubay sa balaud ug hangyo ni Presidente Rodrigo Duterte ang maong lakang sa tinguha nga malikayan ang mga aksidente sa dalan.
Matud ni Caindec nga wala masunod sa mga nanag-iya og trak ang ilang marking capacity hinungdan nga gihimo nila kini nga transportasyon sa mga tawo.
Subay niini, nagpagawas og kamanduan si LTO head Edgar Galvante ngadto sa mga opisina nga mopahigayon og random road inspection sa matag sakyanan, pribado man o komersyal.
Sutaon atol sa inspection kung nag-overloading ba ang matag sakyanan ug aduna bay “road worthiness” base sa mga kahimanan niini.
Kung masakpan man, isyuhan nila ang driver o operator og Temporary Operator’s Permit kon TOP. Gibarugan usab ni Caindec nga nagmonitor pirmi ang LTO sa mga sakyanan nga nagdagan sa kadalanan. (GN)
