LAPU-LAPU CITY,CEBU — Malampusong nahuman ang Traslacion paingon sa Nuestra Señora de la Regla Shrine kabahin sa 461st Fiesta Señor Santo Niño nga gimarkahan sa hapsay, malinawon, ug luwas nga pagdumala sa kalihokan alang sa liboan ka mga deboto ug partisipante sa Dakbayan sa Lapu-Lapu, Enero 16, 2026.
Personal nga nanguna ug nagdumala sa security operation si PCOL Antonietto Y. Cañete, Officer in Charge sa Lapu-Lapu City Police Office (LCPO), ilabina sa deployment sa kapulisan sa tiilan sa Old Bridge, Barangay Pajo. Ang operasyon gipahigayon subay sa LCPO IMPLAN alang sa Fluvial ug Traslacion Procession, nga naka-punting sa peace and order, crowd control, ug emergency preparedness ug response.
Kapin sa 800 ka mga personnel gikan sa PNP, AFP, BFP, BJMP, CDRRMO, Red Cross, ug uban pang support units ang gipakatap, nga gisuportahan sa mga force multipliers ug emergency assets aron masiguro ang paspas ug epektibong responde sa bisan unsang emerhensiya.
Sumala sa LCPO, luwas nga nakasulod sa Lapu-Lapu City ang convoy sa Imahe ni Señor Sto. Niño alas 6:02 sa buntag ug miabot sa VDR Church alas 6:50 sa buntag, nga nakadani og gibanabanang 1,800 ka deboto.
Daghang mga deboto usab ang anaa sa ruta sa prosesyon gikan sa tiilan sa Old Bridge padulong sa Nuestra Señora Virgen de la Regla Parish Church sa Barangay Poblacion.
Sa wala pa sugdi ang kalihokan, gipatuman ang pre-event paneling, red teaming, security inspection, ug radio communication checks. Wala’y natala nga bisan unsang insidente bisan pa sa maulanong kahimtangan sa panahon, nga nagpakita sa lig-on ug epektibong inter-agency coordination.
Gitambongan usab ang maong kalihokan ni Lapu-Lapu City Mayor Hon. Maria Cynthia K. Chan, kauban ang mga konsehal ug mga department heads sa dakbayan, nga nagpamatuod sa suporta sa lokal nga pangagamhanan sa malinawon ug luwas nga pag-obserbar sa Fiesta Señor.
Ang kalampusan sa maong solemne nga kalihokan gipahinungod sa lig-on nga panaghiusa ug koordinasyon tali sa kapulisan, partner agencies, ug force multipliers, nga adunay dakong papel sa pagmintinar sa kalinaw ug kahusay atol sa pagselebrar sa Fiesta Señor ug Sinulog Festival 2026.
