CEBU CITY- Gikatakdang ipahigayon ang seremonya sa paglingkod ni Tagbilaran Bishop Abet Uy isip bag-ong Arsobispo sa Sugbo, karong Martes, Setyembre 30, 2025.
Tungod niini, giandam na sa Cebu City Police Office (CCPO) ang hugot nga seguridad aron masiguro ang kahapsay ug kaluwasan sa maong dakong kalihukan.
Matod ni Police Captain Charisma Gonzales,ang tigpamaba sa CCPO, nga magpabilin sa heightened alert status ang CCPO hangtod matapos ang seremonya.
Gilauman nga motambong ang liboan ka mga deboto ug dagkong personalidad sa Simbahan, lakip na ang Papal Nuncio, Prefect for Evangelisation Cardinal Luis Antonio Tagle, ug CBCP President Cardinal Pablo David.
Alang sa siguridad, ipatuman ang full deployment sa kapulisan, dugang nga police visibility sa mga dapit nga adunay daghang tawo, paggamit sa surveillance drones, ug ubang taktika aron maprotektahan ang mga deboto ug bisita.
Giawhag usab sa kapulisan ang publiko nga magmatngon sa palibot, ampingan ang kaugalingon, ug dayon nga ireport sa mga otoridad ang bisan unsang kadudahang lihok o krimen.
