Liboan ka mga Koreano ang nagprotesta ug nagpundok sa gawas sa National Assembly sa Seoul, South Korea.
Kini taliwala sa pagbotar sa ikaduhang pagsuway sa pag-impeach sa Presidente sa South Korea nga si Yoon Suk Yeol human napakyas ang kanhing pagsuway niadtong Sabado, Disyembre 7 human sa walkout ug boycott sa mga magbabalaod gikan sa nagharing partido People Power Party.
Basi sa opisyal sa Seoul Police, gibanabana nga 200,000 ka mga tawo ang nagtapok gawas sa parliament aron suportahan ang impeachment ni Pres. Yoon.
Samtang sa ubang dapit sa Gwanghwamun Square sa kaulohan sa South Korea, gibana-bana nga 30,000 ka mga tigpaluyo ni Presidente Yoon ang nagpundok usab aron ipakita ang ilang suporta sa Presidente nga nag-awit sa mga patriotikong awit ug nagwarawara sa mga bandila sa South Korea ug Amerika.
