CEBU CITY-Dul-an sa usa ka libo ka mga Sugbuanon, kasagaran mga senior ug persons with disability (PWDs), ang nakapahimulos sa libre nga serbisyo gikan sa medikal ngadto sa legal nga mga butang niadtong nakalabay nga adlaw sa Plaza Sugbo grounds atbang sa Cebu City Hall.
Kining mga libreng serbisyo nga naglakip sa medical, dental, surgical ug legal nahimong posible pinaagi sa Halad Pangpangalad’s outreach program sa Cebu CMC-College of Nursing Alumni Association.
Gusto sa mga alumni nga muhatag ug balik sa mga isigka-Sugbuanon ilabina sa mga kabos pinaagi sa paghatag niini nga mga serbisyo.
Hingpit nga nasayod ang CCMC-CNAA nga daghan gihapon ang mga Sugbuanon nga naglisod sa pagkuha og dekalidad nga serbisyo sa panglawas ug legal nga suporta.
Ang Research Institute of Aging and Health sa Cebu Normal University, Department of Health-7, Cebu City Medical Center, ug ang kagamhanan sa dakbayan nitabang usab sa maong outreach program.
Gawas sa pagkonsulta sa mga doktor, pipila niini nagtrabaho na sa Chong Hua Hospital, nanghatag sila og mga libreng tambal atol sa kalihokan.
Sa kalamposan sa maong outreach program, doble nga selebrasyon ang gipaabot sa Grand Alumni Homecoming niini.
