CEBU CITY- Gilauman nga mokabat sa 3,000 hangtod 5,000 ka katawhan ang motambong sa usa ka indignation rally nga ipahigayon ugmang adlawa sa Fuente Osmeña Circle, dakbayan sa Sugbo.
Ang maong rally gipangulohan sa grupo nga Panaghiusa sa Yanong Sugbuanon Batok Korapsyon o mas nailhan nga PAYONG.
Sa pakighinabi sa Bombo Newsteam, si Jaime Paglinawan, chairperson sa BAYAN Central Visayas, mipadayag nga nagpadayon ang ilang panawagan alang sa hustisya ug accountability, ilabi na batok sa ilang giingong nagkataas nga korapsyon sa mga proyekto sa gobyerno, ilabina sa mga infrastructure projects.
Gipadayag usab ni Paglinawan nga ang PAYONG usa ka koalisyon sa grassroots organizations nga gilangkuban sa kabatan-onan, relihiyoso, negosyante, propesyonal, mamumuo, ug mga aktibista nga nanawagan alang sa hustisya ug limpiyong pang-gobyerno.
Ilang gibatikos ang misuse sa pondo sa mga proyekto, overpricing, substandard nga pagtukod, ug panagkunsabo tali sa mga kontraktor, opisyales sa DPWH, ug pipila ka mga politiko.
Sa dili pa sila mag-abot alang sa hiniusang rally, adunay mga kalihukan nga pagasugdan sa BAYAN Central Visayas, kini pinaagi sa martsa gikan Fuente padulong Colon sa alas 8:00 sa buntag.
Samtang, ang Partidong Manggagawa (PM)-Cebu pinaagi ni Dennis Derige magsugod og rally sa Mactan Export Processing Zone (MEPZ) ug mosunod sa rally sa Fuente Osmeña Circle.
Sa kataposan, mipadayag ang PAYONG nga dili sila mohunong hangtod makab-ot ang tinuod nga hustisya alang sa katawhan.
