Liboan ka mga pro-Palestinian nga demonstrator ang nagparada tabok sa Sydney Harbour Bridge niadtong Domingo, kinsa nanawagan og ceasefire ug tabang alang sa Gaza nga nag-atubang karon og grabe nga gutom tungod sa blockade sa Israel.
Ang protesta giaprobahan sa Korte Suprema sa Australia usa ka adlaw sa wala pa ang kalihokan.
Bisan pa sa kusog nga hangin ug ulan, midayon ang rally diin ilang gisiyagit ang “Ceasefire Now” ug “Free Palestine” samtang nagdala og mga kaldero ug kaserola aron ipakita ang krisis sa kagutom.
Ang “March for Humanity” misunod sa joint statement sa Australia ug ubang nasod nga misuporta sa posible nga pag-ila sa estado sa Palestina isip kabahin sa two-state solution.
Nanawagan ang Australia alang sa pagtapos sa gubat sa Gaza, apan sa pagkakaron mihunong sa usa ka desisyon sa pag-ila sa usa ka Palestinian nga estado.
Basi sa datos sa pulisya anaa sa 90,000 ka mga tawo ang mitambong sa protesta, samtang ang organizer, ang Palestine Action Group Sydney, nagsulti nga anaa sa 300,000 ka mga tawo ang nagmartsa.
