MANDAUE- Adunay pagatukurong Libreng Electric Vehicle Charging Station sa dakbayan sa Mandaue.
Kini human nagpinirmahay og kasabutan ang kagamhanang dakayan sa Mandaue nga girepresentaran ni Mayor Glenn Bercede ug sa ahensya sa Department of Energy sa Mandaue City Hall kagahapong adlawa sa Biyernes, Pebrero, 21, 2025.
Matod pa sa maong kasabutan sa ig-abot sa 2nd Quarter sa tuig 2025 kay gikasabutang mag install og libre nga Electric Vehicle Charging Station nga mahimutang sa Mandaue City Heritage Plaza Parking Building sa Barangay Centro sa naasoy nga dakbayan.
Gilantawan kining makahatag og higayon sa mga electric vehicle owners sa pag-charge sa ilang behikulo kung anaa sa publiko.
Uban sa mayor sa dakbayan kay milagda usab sa kasabutang si Mandaue City Planning Head Development Officer Architect Marlo Ocleas uban sa tinugyanan sa Department of Energy – Visayas Field Office OIC Director Renante Sevilla.
Sa higayong mapatuman na ang proyekto kay matanyag ang dakbayan sa Mandaue isip pinaka-unang Highly Urbanized City sa nasud nga adunay libreng Electric Vehicle Charging Station para sa publiko.
