Hatagan og bug-at nga pagtagad sulod sa adminitrasyon ni Mayor-elect Nestor Archival ang libre nga papa-ospital sa Cebu City Medical Center (CCMC), ug ang pag-audit niini aron mapangitaan og paagi nga mahuman na ang pagtukod sa edepisyo niini, ug ang aspeto nga nag linya sa edukasyon.
Kini nga mga panaad na saksihan sa kadaghanan sa iyahang pagpanumpa kagahapong adlawa, Mayo 13, subay sa bag-o niyang katungdanan isip pangu sa Dakbayan sa Sugbo, inubanan sa Vice Mayor-elect Tomas Osmeña.
Sumala pa, gawas sa iyahang pagpokus sa edukasyon ug pagpa-ospital, lakip na usab sa iyahang kargahon nga katungdanan mao ang pag-umol sa “Mayor of the Night” diin tumong niini mao ang pag-alagad sa mga sugbuanon sa tibuok 24 oras.
Dugang niya, mao kini ang buot niya nga konsepto nga “City Hall that never sleeps.”
Samtang, mapaabot usab sa mga Sugboanon ang “streamlining” sa pagpadagan Kagamhanan sa Dakbayan sa Sugbo ug ang pagpalig-on sa mga kalihokan nga mopalambo sa panalapi.
Gipaniguro usab ni Mayor-elect Archival nga ibalik nga 24 oras nga bukas ang Cebu City Public Library, ug nipasalig pud siya nga sa pagkakaron, “status quo” ang ipatuman kabahin sa casual ug job order nga mga kawani sa City Hall.
Pulong niya, makapaabot nga magpabilin sa katungdanan kadtong mga kwalipikado sa mga posisyon nga ilang gihuptan ug makapakita og resulta sa ilang mga trabaho.(Bombo Irene Ardiente)
