Nabalik ang mga matam-is nga pahiyom sa mga kabus nga kabataan nga natawo nga adunay deperensya sa ilang pisikal nga panagway, sama sa “cleft lift” ug “palate,” pinaagi sa libreng operasyon nga gipasiugdahan sa Kiwanis Club of Cebu ug Operation Rainbow Australia Ltd. (ORAL).
Sulod sa 15 ka tuig, ang maong talagsaong misyon nagtinabangay sa paghatag og dako ug dinalian nga kausaban sa kinabuhi sa mga bata pinaagi sa pagpadala ug mga hanas nga doktor ug nurse gikan sa Australia padulong dinhi sa Sugbo, aron magpahigayon og libreng plastic surgery.
Gawas sa pag-ayo sa ilang mga panagway, ang maong tinuig nga proyekto nagtumong usab sa pagpabalik sa kompiyansa sa kaugalingon sa mga bata aron sila makasulti ug makatungha nga walay kaulaw o kahadlok.
Sa pakighinabi sa Bombo Radyo Cebu news team sa mga miyembro sa Kiwanis Clube Cebu, usa na niini si Elvira Peres Goll, iyahang gipasabot nga sa tibuok proseso, sugod sa screening o pagsusi sa mga pasyente, pag-iskedyul sa operasyon, hangtod sa pag-atiman human sa operasyon, hingpit nga libre ug walay bisan usa ka dako nga gastuhon ang mga pamilya.
Kining tanan nahimong posible tungod sa pakigtambayayong sa Adventist Hospital Cebu, ICM, ug Abounding in Love.
Subay niini, aron mamintinar ug mapadayon kining makabayanihong misyon, ang Kiwanis Club of Cebu kasamtangang nagbukas sa ilang “Pledge of Support” alang sa mga manggihatagon nga gustong modonar.
Samtang, personal usab nga mibisita sa sibyaanan sa Bombo Radyo Cebu ang duha sa nga naka benipisyo sa tabang sa Kiwanis Club nga mao sila si Sheena Rose, kinsa mao ang inahan usab sa 4 anyos nga si Janella Sheen, kinsa usa sa mga “successful” nga na operahan.
Ingun man si Celeste Margaret usab nga inahan sa 3 anyos nga si Rejie Nuñez, nga natabenipisyo usab sa libreng operasyon, akomodasyon sa Kiwanis Club.
Sa gikabutyag ni Sheena Rose, dako ang iyahang pasalamat sa Kiwanis gumikan kay alang kaniya, nakahatag kini og paglaom kaniya ug mas nakita niya ang mani maanindut nga kaugmaon nga naghuwat sa iyahang anak.
Alang sa mga interesado nga motabang, mamahimo kining ipadala pinaagi sa ilang bank account sa China Bank Corp (Account Name: Cebu Kiwanis Foundation Inc., Account No: 1670268019) o pinaagi sa GCash (Account Name: Elvira Goll, Account No: 0921 548 4848).
Ingun man nga mamahimo usab kamo nga mopadangat og mensahe sa Bombo Radyo Cebu, pinaagi na sa “Bombo Radyo Cebu DYMF” Facebook page.
Ang maong tanyag nga tabang mga Ka-Bombo, libre tanan. Gikan sa pliti, pagkaon, ug kapuy-an, libre tanan, ug kini dili lang alang sa mga indibidwal dinhi sa Kabisay-an, apan lakip na usab ang nagkalain-laing dapit sa nasud.
