CEBU – Wala makigtigi ang Libreng Sakay program nga gipasiugdahan ni Mayor Junard “Ahong” Chan sa panginabuhi sa mga PUV driver sa dakbayan sa Lapu-Lapu.
Kini nga giklaro ni City Councilor Jun Alforque nga maoy chairman sa Committee on Transportation sa dakbayan niadtong Miyerkules, Hulyo 13.
Sa sayo pa, gipahibawo ni Chan ang pagpatuman sa “Libreng Sakay” pinaagi sa pagdeploy og mga bus diin libre ang sakyan sa mga sumasakay.
Gipasabot ni Chan nga iya kining gihimo aron maminusan ang epekto sa pagsaka sa presyo sa gasolina sa mga pasahero.
Matod ni Alforque nga gusto lang sa programa nga ma-accommodate ang mga pasahero nga dili na ma-accommodate sa mga PUV, ilabi na sa peak hours.
Gibutyag usab ni Alforque nga ilaha na karong gisusi ang mga rota sa mga “Free Ride” buses.
