Lider sa mga rebelde sa Syria, misaad nga sirad-an ang prisohan nga gipadagan ni kanhi presidente Bashar al-Assad

Misaad ang lider sa rebeldeng Syria nga si Abu Mohammed al-Jolani nga isira ang banggiitang prisohan nga gipadagan sa gipalagpot nga presidente nga si Bashar al-Assad ug gukdon ang mga nalambigit sa pagpatay o pagtortyur sa mga piniriso.

Matod niya, iyang bungkagon ang mga pwersa sa seguridad sa miaging rehimen.

Sa usa ka video nga gipagawas human nahugno ang Assad government niadtong Domingo, makita ang pagpagawas sa liboan ka mga binilanggo gikan sa prisohan sa Sydnaya, nga gitawag nga human slaughterhouse sa mga human rights group.

Mikabat sa 60,000 ka mga tawo ang gitortyur ug gipatay sa mga prisohan nga gipadagan ni Assad, sumala sa UK-based monitoring group Syrian Observatory for Human Rights.