NEGROS ORIENTAL-Patay ang usa ka indibidwal samtang usa ang samdan human sa nahitabong tinigbasay kagahapon sa buntag, Lunes, Marso 25, 2024 sa Sitio Avocado, Brgy. Talalak, Sta. Catalina, Negros Oriental.
Sa pakighinabi sa Bombo Newsteam kang Police Major Jerry Leones, ang hepe sa kapulisan sa Santa Catalina Police Station, giila niini ang namatay tungod sa tinigbasan nga si ‘Jon-jon Tapil, hingkod ang pangidaron ug lumolopyo sa maong dapit.
Samtang ang suspetsado giilang si ‘Jemar Bulandres,’ residente usa sa susamang dapit.
Asoy pa sa opisyal nga basi sa imbistigasyon nga ilahang gihimo, giingong gipasanginlan sa suspek ang biktima nga maoy nikuha sa iyang lighter hinungdan nga nahitabo ang mainiton nga panaglalis tali sa duha nga misangpot sa tinigbasay.
Dugang pa, nga patay diha-diha dayun ang biktima human gigulgol sa liog ug nakahiagom og grabing samad sa kalawasan.
Samtang ang suspetsado nga nakaangkon usab og mga samad sa kalawasan naka hospital arrest human gidala sa Bayawan City District Hospital aron matambalan.
Nasayran nga ‘self defense’ ang gihimo ni Bulandres gumikan kay si Tapil ang unang nitigas kaniya ug nailog lamang niini ang naasoy nga hinagiban.
Dugang pa, nga aduna nay kasungian kaniadtu ang suspetsado ug ang biktima, nibalik lang ang kainit sa isyu human nga nagkabikil sa lighter.
Sa pagkakaron, ang suspek gi-inquest na sa kapulisan samtang gihikay ang tukmang kaso alang kaniya.
