CEBU – Lauman ang usa ka lihok protesta nga pasi-ugdahan sa Alyansang Makabayan, agi ug pagsugat sa inagurasyon ni President-elect Ferdinand ‘Bongbong’ Marcos, Jr.
Gipahibalo ni Jaime Paglinawan, chairman sa AMA-Sugbo-KMU, nga magpadayon ang ilahang baruganan nga ang kwestyonabli ang nahitabo nga eleksyon niadtong nakalabay nga Mayo 9, diin giingong napuno kini sa halapad nga pagpanikas.
Gani, gitawag niini nga usa ka “illegitimate” nga presidente si Marcos, Jr. human nga giingong midaug pinaagi sa tikas gamit ang automated election system, disinformation, ingon man ang pagbaha sa kwarta niadtong nakalabay nga pinili-ay.
Sa pagkakarun, gitataw ni Paglinawan nga ilaha pang gi-finalize ang venue nga pahigayonan sa ilahang lihok protesta, ug ingon man ang oras nga ilaha kining pagasugdan.
