CEBU CITY – Gisiguro sa Lite Shipping Corporation nga maghatag ug tabang pinansyal sa tanang mga pasahero sa M/V Lite Ferry 16 nga nasunog samtang anaa sa kadagatan paingun sa Dapitan City, Zamboanga Del Norte.
Gipadayag ni Fernando Inting, ang Chief Operating Officer sa nahisgutang shipping company, nga muhatag sila ug P10,000 sa matag pasahero sa nasunog nga barko.
Matud ni Inting nga nagpadala na usab sila ug 4-man team nga mao’y mu asikaso sa tanang mga panginahanglan sa mga biktima.
Dugang pa niini nga makuha usab sa mga pamilya sa tulu ka mga namatay nga pasahero ang ilahang mga insurance.
Giila ang mga namatay nga sila si Chloe Labisig, 1 taong gulang, Danilo Gomez, 60, at Ronaldo Heneral, 65 taong gulang.
Gipahibalu usab ni Inting nga nagpadala na usab sila ug duha ka tugboats sa area arun nga ibalik ang nahisgutang barko sa pantalan.
Sa pagkakarun, nakig-alayun na ang management sa nahisgutang shipping company sa Philippine Coast Guard sa ipahigayun nga imbestigasyon ug giingung isumitir sa kompanya ang Marine Protest sulud sa 24 oras base na usab sa request sa PCG ug MARINA Rules and Regulations.
Samtang, gipadalhan ug showcause order ang mga opisyal ingun man crew sa nasunog nga M/V Lite Ferry 16 arun sila patubagon sa maong insidente.
Kini ang gipahibalu ni Atty Mark Daniel Oral, ang MARINA-7 Chief of Staff, atul na sa eksklusibo nga pakighinabi sa Bombo News Team.
Matud ni Atty Oral nga ilahang susihon ang tanang ship documents sa maong barko ug magpahigayun ug evaluation.
Sigon pa nga paatubangon sa MARINA ang kapitan, chief engineer ug mga crew sa nahisgutang barko arun nga masuta ang hinungdan sa insidente.
Gibutyag ni Atty Oral nga kung ugaling mapamatud-an nga adunay pagpabaya sa mga opisyal ug crew hayan i-revoke ang mga lisensya niini ug dili na gayud kini makatrabaho pa ug balik sa barko.
Dugang pa niini nga i-revoke usab ang prangkisa sa kompanya apan gikinahanglan pa sila nga mag-formulate niini ug assessment.
Lakip ang MARINA sa nag-monitor sa mga naluwas nga pasahero sa nahisgutang insidente. (SBR)
