LAPU-LAPU CITY-Gihimakak ni Lapu-Lapu City Mayor Junard “Ahong” Chan nga empleyado sa kagamhanang dakbayan sa Lapu-Lapu ang usa ka Chinese National nga nasikop atol sa POGO Raid niadtong Agosto 31 sa Tourist Garden Hotel sa Barangay Agus sa maong dakbayan.
Kini human nasikop sa mga ahente sa National Bureau of Investigation Central Visayas (NBI-7) ang usa ka ID sa maong langyaw nga nagngalan og Zhao Shouqi nga adunay posisyon nga “Consultant on Chinese Business Promotions” ubos sa Opisina sa Mayor sa maong dakbayan.
Kung sa unang langtaw palang, mura og lehitimo ang maong ID kay aduna pa kiniy pirma sa mayor apan daling gipalaw ang maong impormasyon pinaagi sa social media account ni Chan nga dili tukma ang format sa maong ID ug walay record sa iyang opisina nga empleyado ang maong lanyaw.
Giangkon hinuon sa Mayor nga si Shouqi nakadonar og mga computers sa City Hall ug Solar Light sa isla sa Olango niadtong tuig 2019.
Gipasabot pa sa Mayor nga ang iyang dakbayan wala mag-isyu og ID card alang sa mga consultant apan ang Local Government Unit (LGU) lang hinuon ang naghatag og sertipikasyon.
