CEBU CITY-Nadakpan na ang nagpusil patay sa usa ka 19-anyos nga habal-habal driver sa Sitio Nivel, Barangay Busay sa dakbayan sa Sugbo kagahapong adlawa.
Giilia ang biktima nga si Marvin Tangente Caballes nga taga Sitio Lupa Barangay Busay nga nakaangkon og samad pinusilan sa lawas.
Nadakpan sa Mabolo police station sa gihimong manhunt operation sa pagpangulo ni Police Major Eraño Regidor ang responsabli didto sa Sitio Golden Valley, Barangay Lahug sa dakbayan sa Sugbo nga giila nga si Wilbert Belarmino alyas Pungkol 23, nga nag puyo sa maong lugar.
Nakuha sa posisyon sa suspetsado ang usa ka kalibre 45 (Colt) nga dunay mga bala sa magazine niini.
Matod sa usa sa mga imbestigador sa Mabolo police station nga ang biktima dunay utang nga mobalor sa P60,000 sa usa ka drug player nga naa na sa sulod sa City Jail.
Giingong gi-hire ang suspetsado nga si Wilbert Belarmino alyas Pungkol nga taga Sitio Golden Valley balo P30,000 aron likidahon si Caballes.
Dugang niini, wala lang una mobutyag ang kapulisan kung kinsa ang drug player nga nabilango na ang nagsugo sanglit nagpadayon karon ang ilang gihimo nga follow up operations.
