CEBU – Wala pa matino kung aduna bay local transmission sa monkeypos virus sa Pilipinas.
Kini nunot sa natala nga ikaupat nga kaso sa monkeypox sa nasud niadtong Lunes, diin usa ka 25-anyos nga Filipino national nga walay travel history gikan sa ubang nasud nga nakatala na og kaso sa monkeypox.
Matod ni Department of Health (DOH) officer-in-charge Maria Rosario Vergeire, nga kasamtangang nagpahigayon og back tracing ang departamento sa tinubdan sa impeksyon o giunsa natakdan ang pasyente.
Sa pagkakaron, anaa sa isolation facility ang pasyente samtang 14 sa iyang close contacts ang naila.
Sa laing bahin, nakig-alayon usab ang DOH sa duha ka mga tiggama sa bakuna sa monkeypox aron makadawat sa unang dosis sa bakuna batok sa maong sakit.
Sumala ni Vergeire, gitrabaho na sa kagamhanan ang pagkuha og monkeypox vaccine sa nasod sa dili pa matapos ang kasamtangang tuig.
