CEBU CITY-Misugyot si Atty. Clarence Paul Oaminal usa ka manlalaban ug pangu sa Task Force Haring Tupas ngadto sa Cebu City Government nga himoong ‘one stop shop’ ang Fort San Pedro alang sa proseso alang sa mga LSI o mga Locally Stranded Individual.
Kini human nga nabantayan sa manlalaban nga lisod ang proseso ug walay ahensya sa gobyerno nga mitutok niini sanglit ang mga na-stranded dili man botante.
Matud ni Oaminal sa dihang nahinabi sa Bombo Radyo Cebu sa tulumanong Zona Libre nga mismo ang pamaagi niini, ang wala matud pa natarong og pasabot diin ubay-ubay ang wala nakahibalo sa proseso.
Sa nasayran kinanahanglan nga muadto pa sa barangay kung asa natanggong ang LSI, pagkahuman, mu-adto sa City Health Office para makapangayo og medical certificate ug muadto pa sa city hall. Pagkahuman na usab niini, muadto ang usa ka LSI sa PNP sa ilang area ug i-forward pa ang papel niini ngadto na sa regional office sa dili pa matagaan og ‘travel authority’.
Matud ni Oaminal nga looy ang mga LSI sanglit sagad niini karon dinhi sa Sugbo, mga estudyante, mga nagbakasyon lang ug mga displaced worker.
Boot sa manlalaban nga bakwion nalang sa Inter-Agency Task Force (IATF) ang dili pagpauli sa mga LSI sanglit wala may gihatag ang gobyerno ngadto kanila ug kining maong mga LSI ang matud pa wala nay kwarta.
Kung dili matud pa kini’ng mga LSI papauli-on, hayan pakan-on.
Sa nasayran, human nga gipa-ubos sa Enhanced Community Quarantine ang Sugbo, mipatuman usab ang DILG og travel ban alang sa mga LSI.
