CEBU CITY-Padayon gihapon ang pagpahigayon sa search and retrieval operations sa mga nagkalain-lain divers gikan sa Philippine Coast Guard (PCG) ug lokal nga kagamhanan aron makit-an ang batan-ong spear fisher nga wala na mopatim-aw niadtong Disyembre 25, 2023, adlaw sa pasko sa iyang pag dive sa Liloan, lungsod sa Santander.
Matod pa sa lokal nga kagamhanan sa lungsod sa Samboan nga nipahigayon og lain search and retrieval operation ang mga sakop sa PCG inabagan sa mga local disaster risk reduction and management offices sa Samboan ug Santander.
Atol sa adlaw sa pasko, unang natahong missing ang 21 anyos nga si Louis Jullan Jugo Dayot, residente sa San Sebastian (Bato), Samboan.
Matod pa sa post sa iyaan niini nga si Rosebud Babarts, pasado alas 6:30 sa buntag kini nga namana aron testingan ang iyang bag-ong spear fishing gear.
Inubanan sa iyang diving buddy, si Louis Jullan ni dive ug nipatim-aw pa sa iyang unang kuha diin nga mibalik kini og dive apan wala na motumaw pagbalik hinungdan nga nagpakitabang na ang iyang kauban sa mga otoridad.
Sa pagkakaron, gikompirmar pa sa mga otoridad sa lungsod sa Samboan ang taho diin aduna’y ang scuba gears nga nakit-an sa lungsod sa Amlan, sakop sa lalawigan sa Negros Oriental.
