Gipamatud-an sa 99-anyos nga lola nga walay katapusan ang kalipay bisan pila pa ang edad niini human nakuha ang Guinness World Record isip pinakatigulang nga tawong nag-crowd surf.
Maisugon nga naki-ride taliwa sa concert crowd si Pauline Kana, nga mas naila sa internet isip si “Gangster Granny”.
Ang crowd surfing usa ka aktibidad sa mga concert diin gialsa ug gipasa-pasa sa mga manan-away ang usa ka tawo sa ibabaw sa ilang mga kamot samtang miandar kini sa ibabaw sa kadaghanan.
Nahitabo ang talagsaong kalampusan niadtong nakalabay nga buwan sa concert sa country-rock musician nga si Brantley Gilbert sa Texas.
Sa tabang sa iyang apo nga si Ross Smith, gialsa si Pauline sa mga nanan-aw samtang nakahigda sa usa ka stretcher paingon sa atubangan sa entablado samtang gisinggit sa mga tawo ang pulong nga Granny.
Sa una, naghawid lang kini sa kilid sa stretcher hangtud nga malipayon na niining gikaway-kaway ang iyang kamot samtang mipahiyom.
Sikat ang mag-lola sa social media diin minilyon ang nagsunod niini.
Sumala ni Pauline, hilabihan ang iyang kalipay nga ang ilang mga videos nahimong tulay aron subling mapadool ang mga kabataan sa ilang mga lolo ug lola.
Human ang concert, malipayong gisinggit ni Pauline samtang gikuptan ang iyang Guinness certificate nga siya na ang pinaka-astig nga lola sa tibook kalibutan.
