Cebu City-Atol sa kasaulugan sa International Women’s Day ,nasikop ang mag inahan sa gipahigayong buybust operation sa mga sakop Mambaling police station sa Sitio Mansanitas, Brgy Duljo Fatima ning dakbayan sa Sugbo.
Ang subject sa buybust ,mao si Maribel Mancao , 36 anyos diin nakuhaan kini ug 20 ka gramos sa gituohang shabu . Matud ni Maribel nga gi recruit lamang siya aron musulod sa maong iligal nga bisyo ug gumikan sa kawad-on , misulod nalang usab kini sa maong matang sa negosyo.
Gibutyag niini nga ihatud lamang kaniya ang supply gikan ni a certain Banjo ug siya na maoy tig-repack ngadto na sa mga gagamay nga pakete. Samtang atol sa operasyon nasikop usab ang inahan ni Maribel nga si Maria Theresa Togeno, 55 anyos kinsang miangkon usab nga namaligya ug shabu.
Matud ni Togeno nga miundang na siya sa pagpamaligya niadtong nadakpan siya sa mga sakop sa City Intelligence Branch niadtong tuig 2016 ug bag-uhay ra kini mibalik sa pagpamaligya.
Gibutyag niini nga aron nga duna siyay pabalon sa iyahang apo ug makatabang sa iyahang anak maong nibalik siya sa pagpamaligya og iligal nga drogas.
Matud ni Police Sr Inspector Llewelyn Reyes , ang deputy for operations sa Mambaling Police station nga hapit 3 ka buwan nila nga gipaubos sa surveillance ang subject . Nagtingkagol na karon sa Mambaling lock -up cell ang mga dinakpan.
