Lolo, 69, natanggong sa lawak, namatay sa sunog sa hapon sa Mandaue

MANDAUE CITY, CEBU – Patay ang 69-anyos nga lolo ug tag-iya sa duha ka andana nga balay sa Barangay Subangdaku, dakbayan sa Mandaue human kini natanggong sulod sa iyang lawak dihang nasunog ang balay pasado alas 3 sa hapon, Agosto 7.

Giila sa imbestigador sa Mandaue City Fire Office, ang namatay nga lolo nga si Apolonio Minaling Jr.

Ang lawas ni Minaling napalgan sulod sa iyang lawak sa ikaduhang andana sa duha ka andana nga balay sa may Hernan Cortes St., Sitio Nawanao, Barangay Subangdaku.

Nasayran sa anak ni Minaling nga hinay na nga molakaw ang iyang amahan human adunay problema sa iyang panglawas.

Nagsugod ang sunog sulod sa lawak sa 69-anyos nga lolo ug ila kining gisusi kon tungod ba kini sa over heat sa electric fan.