CEBU CITY-Gipasabot ni LTFRB 7 Regional Director Eduardo Montealto, Jr. nga dili “reduction of fare” ang gisugyot sa Department of Transportation (DOTr) kalabot na sa pagpakunhod unya sa pletehan sa mga pasahero.
Matud pa, magpabilin sa gihapon ang minimum fare apan gamay na lang ang pletehan sa mga pasahero gumikan i-subsidize kini sa DOTr ingon man sa LTFRB.
Sigon pa ni Montealto nga tunga-an sa LTFRB ug sa DOTr ang maong subsidiya hinungdan nga mugamay na lang ang pletehan sa mga pasahero.
Apan iyahang gitataw nga wala pa gayud masayri kung pila na lang ang mahimong pletehan sa mga pasahero gumikan kay sa pagkakarun wala pa man usab makalusot ang pondo alang sa maong programa.
Gidugang pa niini nga kung mahurot na ang pondo alang sa maong subsidiya kay mahunong usab ang maong programa ug mubalik sa agi ang pletehan sa mga pasahero.
Gipahibalo usab ni Montealto nga ang prayoridad nga malakip sa maong programa kay ang mga modern ug traditional nga jeep, ug mag-depende na lang sa pondo kung mahimong malakip ang mga buses.
Gitino niini nga walay labot sa maong programa ang mga TNVS o kadtong walay mga fixed route.
