Nakapang-apod-apod na og fuel subsidy ang Land Transportation Franchising and Regulatory Board sa Central Visayas (LTFRB-7) ngadto sa kapin sa 19,000 ka mga yunit sa public utility vehicle (PUV) sa rehiyon, nga milapas na sa 80% sa ilang target.
Matod ni LTFRB-7 Regional Director Abosamen H. Matuan sa usa ka bag-o nga press briefing, ang pagpang-apod-apod ngadto sa mga indibidwal nga drayber nga benepisyaryo miabot na sa kapin sa 30%.
Giingon ni Matuan nga naningkamot ang ahensya nga mapadali ang pagpagawas sa pondo, lakip na ang sugyot nga ipaagi ang distribusyon sa mga regional office.
Ang mga bayad kabahin sa Fuel Subsidy Program sa Department of Transportation, nga naghatag og cash assistance base sa mga kantidad nga gitakda sumala sa klase sa sakyanan.
Diin ang mga operator sa tradisyonal nga jeepney makadawat og P5,000 matag yunit ug ang ilang mga drayber makadawat og P1,500 matag usa; samtang ang mga operator sa modernong UV Express makadawat og P10,000 ug ang ilang mga drayber makadawat og P5,000 matag usa.
Samtang ang mga kwalipikadong drayber nakadawat usab og P5,000 nga cash relief gikan sa Department of Social Welfare and Development, ug ang maong tabang gihatag pinaagi sa cash ug digital nga mga plataporma.
Samtang si Ellen Maghanoy, presidente sa Cebu Federation of Transport Cooperatives, nag-ingon nga halos tanang miyembro sa 13 ka mga kooperatiba nga sakop sa federation nakadawat na sa ilang mga subsidy.
Matod ni Maghanoy, ang mga subsidy nakatabang sa mga kooperatiba sa pagdumala sa ilang mga galastohan sa operasyon.
