CENTRAL VISAYAS-Giawhag sa usa ka opisyal sa Land Transportation Franchising and Regulatory Board sa Central Visayas (LTFRB-7)ang mga sumasakay nga dili mosuporta sa mga “colorum” o dili rehistradong mga sakyanan tungod sa kaluwasan.
Kini ang pahimangnu ni LTFRB-7 director Eduardo Montealto, Jr., sa mga pasahero nga ang pag-supporta sa kolorum nga mga sakyanan makabutang kanila sa disadvantage gumikan kay dili sila makagarantiya nga ang maong mga drayber nakaagi og saktong academy training gikan sa LTFRB ug defensive driving training gikan sa Land Transportation Office (LTO).
Matud pa ni Montealto nga ang kakuwang sa gikinahanglang mga sticker sa Department of Transportation (DOT) sa atubangan o likod sa bus o van maoy timailhan nga dili rehistrado ang mga sakyanan.
Niining panahon sa Semana Santa, ang nagkalain-laing sektor sa kadalanan ubos sa DOT, apil ang LTFRB ug LTO, nagsugod na sa pagpahigayon og inter-agency operations gikan Marso 31 hangtod Abril 17 aron masiguro ang roadworthiness sa mga public utility vehicles sa dili pa mosakay og mga pasahero.
Matud ni Montealto nga kini maoy pagpausbaw sa ilang inadlaw-adlaw nga operasyon tungod kay ilang gipaabot nga mosaka ang gidaghanon sa mga sumasakay alang sa Semana Santa.
