Mopasaka ang Land Transportation Franchising and Regulatory Board (LTFRB) og mga kasong kriminal batok sa usa ka drayber ug operator sa taxi sa Cebu nga giakusahan og sobra nga pagpaningil sa usa ka South Korean singer .
Matud sa LTFRB nga gawas sa mga kasong administratibo, ang prangkisa sa operator kanselahon usab. Ingon man nga ang taxi i-impound usab ug ang ahensya mokontak sa Land Transportation Office (LTO) alang sa posibleng pagbawi sa lisensya sa naasoy nga driver.
Ang insidente naggikan sa usa ka post sa K-pop idol nga si Soobin sa TXT nga nag-viral sa social media, diin iyang gipaambit nga gi-overcharge sa iyang biyahe.
Diin gikan sa gibanabana nga P350 nga plete, giingong gi-charge og P500 ug sa ulahi gipataas ngadto sa P1,000.
Sumala ni LTFRB Chair Vigor Mendoza II, kini nga insidente magsilbi nga “test case” alang sa usa ka bag-ong palisiya nga magtugot sa diha-diha nga pagpasaka og mga kasong kriminal ug pag-impound sa mga taxi nga nakit-ang nag-overcharge sa ilang mga pasahero.
“Enough is enough. Despite all the understanding the government has extended to these people, they still commit misconduct that brings shame to our country,” matod ni Mendoza.
Ang tumong sa ahensya mao ang pagtapos sa balik-balik nga mga reklamo batok sa mga badlungon nga drayber sa taxi ug pagpanalipod sa mga pasahero, ingon man sa reputasyon sa nasud.
