CEBU CITY — Gipasabot ni Land Transportation Office (LTO-7) Director Victor Caindec nga lahi ang pama-agi karon sa pagkuha sa plaka subay sa panahon sa pandemya.
Nagkanayon kini nga kinahanglang i-text daan ang impormasyon sa kuhaong plaka aron maandam kini mga sakop sa ahensya.
Kini ang nahimong kabag-uhan aron malikayan ang posibleng pagtapok sa mga motorista nga modangop sa buhatan o field office sa LTO-7 alang niini.
Gihulagway ni Caindec nga sama sa ‘files’ ang mga plaka diin kinahanglan pang ukayon aron mapangita ug maandam alang sa pag-claim sa tag-iya.
Matod usab ni Caindec nga ang mga plaka nga girelease karon sa LTO-7 mao ang 27,000 ka mga plate number nga una nang gisugdan sa pag-release niadtong buwan sa Marso apan nahunong lang gumikan sa pandemya.
Subay niini gihangyo sa opisyal ang mga motorista nga mosabot lang og mokooperar alang sa mas dali ug sayon nga proseso sa maong transaksiyon.
Alang sa mga mokuha sa plaka, i-text daan ang plate number ug MV file number, date sa unang registration, ug pangalan sa tag-iya dayon i-send ngadto sa 09473499965.
Abli ang textline sa LTO-7 alang sa pagkuha sa plaka matag Lunes hangtud Biyernes gikan sa alas-8 sa buntag ngadto na sa alas-5 sa hapon. (gbs/gn)
