CEBU CITY — Gihimikak ni Land Transportation Office (LTO-7) Regional Director Victor Caindec ang pasumbingay ni Presidential Spokesperson Harry Roque kabahin sa usa ka kurap nga director sa LTO sa kabisay-an.
Sa dihang nahinabi sa Bombo News Team si Caindec kagahapon, matud pa niini nga bisan og wala nganli sa tigpamaba sa presidente kung si kinsa ang kurap nga opisyal apan kini ang gipadungog-dungog ni Roque.
Gisaysay ni Caindec nga nagsugod ang maong pasangil sa dihang gi-imbestigaran niini ang grupo sa mga motorcycle dealers sa rehiyon kabahin sa anomalya sa rehistro sa mga motor.
Nasayran nga sagad sa mga reklamo nga ilang nadawat gikan sa publiko mahitungod sa kadugay nga mahatag sa mga motorista ang rehistro sa ilang motor.
Sumala pa sa pasumangil sa mga dealer nga dugay mogawas o mo-isyu ang LTO sa naasoy nga papeles ug maabtan pa kini sa tulo buwan o labaw pa.
Nahibulong ang director kung nganung sa iyang ahensya ang pasangil sanglit dugay na kining nagpatuman og kausaban sa procedure arun madali ang pagrehistro sa motor ug ma-release kini gikan sa iyang buhatan sulod lang sa usa ka semana.
Nasayran sa imbestigasyon niini nga tuyuon og dugay-dugay ug usahon sa laing pang customer sa mga dealer ang pagproseso sa pagparehistro niini.
Matud pa ni Caindec kini arun malikayan sa mga dealer ang dakung gasto kundi adunay gitago nga anomalya. (ekp)
