CEBU CITY-Ablihan pag-usab ang Land Transportation Office sa Central Visayas (LTO-7) Mandaue City District Office human sa dul-an siyam ka buwan sukad sa temporaryo nga pagsira niini.
Ang soft launching sa bag-o nga LTO-7 Mandaue City District Office nahitabo niadtong Oktubre 3, Martes, sa bag-o nga lokasyon niini sa ikatulong andana sa City Times Square 2, Barangay Tipolo, Mandaue City.
Kahinumduman, temporaryo nga gisirad-an ang Mandaue City District Office ug Mandaue City Licensing Center niadtong Enero 20, 2023 tungod sa bag-ong pagpanag-iya sa JCentre Mall ug sa dakong renovation sa building.
Nahimutang ang kanhi lokasyon sa LTO-7 Mandaue ngadto sa A.S. Fortuna St., Barangay Bakilid, dakbayan sa Mandaue.
Matod sa LTO-7 sa usa ka pamahayag, ang unang kliyente sa buhatan sa distrito usa ka abogado, atol sa soft launching niini niadtong Martes.
Nitransaksyon ang abogado aron ma-convert ang iyang foreign driver’s license ug ang aplikasyon niini wala molapas sa 15 minutos.
Niingon ang LTO-7 nga sukwahi sa mga huhungihong bahin sa kakuwang sa mga lisensya nga ID card, naka-print ug naka-issue kini og ID nga mahimong pamatud-an sa ilang unang kliyente sa buhatan sa distrito.
