CENTRAL VISAYAS- Gianunsyo sa Land Transportation Office – Central Visayas (LTO-7) sa ilang mas gipakusog nga roadside operations batok sa mga sakyanang adunay unregistered o delinquent registrations, depektibo o dili luwas nga kahimtang sa sakyanan, ug dili saktong pagkataod o dili awtorisadong license plates.
Kini nahisubay sa LTO Memorandum gikan sa ilang Centra Oggice niadtong Mayo 2 diin ang maong ahensya kay magpakusog sa ilang enforcement sa regulasyon sa balaod sa saktong pagtaod sa mga plaka ug episyente nga vehicle identification ug registration.
Matod sa LTO-7 nga ang mga sakyanang nakalapas sa maong balaod kay posibleng mag-atubang og silot magdepende sa kalapasan niini.
Dugang sa ahensya nga subay sa LTO Memorandum niadtong Hunyo 16 kay gimanduan ang tanang enfocement units nila sa pagpahigayon og komprehensibong roadside inspections sa mga behikulong dili rehistrado, expired ang rehistro, depektibong mga part ug accessories o dili roadworthy para sa mga pampublikong kadalanan.
Giawhag sa LTO-7 ang publiko nga ilang kooperasyon aron masiguro ang tinguha nga luwas ug hapsay ang mga kadalanan sa rehiyon.
