CEBU CITY- Gipatawag na sa Land Transportation Office (LTO) Region-7 ang drayber ug operator sa modern public utility jeepney (MPUJ) subay sa rutang 01K, kini human nakuhaan og video ang aktong pagka-abusado niini kay nag-counterflow sa Colon-Mabini intersection ning Dakbayan sa Sugbo.
Matud ni LTO-7 Regional Director Glen Galario, dali siya nga nagmando sa iyahang Operations Division sa pagpagawas og show cause order human naabot sa ilahang buhatan ang video nga ikslusibong nakuha sa Bombo Radyo Cebu. Diin, ang maong drayber ug operator mag-atubang sa kasong Republic Act 4136, ubos sa Section 48 tungod sa reckless driving.
Samtang nagpadayon ang imbestigasyon, gibutang sa “alarm” status ang lisensya sa drayber ug rehistro sa maong jeep, aron mapugngan ang bisan unsang transaksyon niini.
Kahinumduman, nakuhaan og video sa Bombo Newsteam ang abusadong estilo sa pagmaneho sa usa ka modern jeep nga adunay rutang Urgello – Parkmall Mandaue (01K) kun diin makita kining nag-counterflow sa usa ka junction nga adunay stoplight sa tumoy nga bahin sa dalan Colon eskina Mabini ning dakbayan sa Sugbo, Huwebes sa gabii, Hunyo 26, 2025.
