Gi-isyuhan na sa LTO-7 ang drayber sa Ceres bus ug ang nagmaneho sa Honda ADV motorcycle og Show Cause Order kalabot sa ilang panaglalis atubangan sa usa ka mall sa Talisay City.
Sa inisyal nga pagtan-aw sa LTO-7 sa video nga gi-upload sa Facebook, makita ang motorcycle rider nga nangluwa sa drayber sa bus atol sa ilang komprontasyon.
Ang insidente gikataho usab nga nakamugna og hugot nga trapiko sa maong lugar.
Gipatawag na sa ahensiya ang duha ka drayber aron maghatag og katin-awan sa ilang tagsa-tagsa ka bahin sa maong panghitabo.
Nagpadayon usab ang imbestigasyon aron mahibal-an kung aduna ba silay nalapas nga mga lagda sa pagmaneho ug kung angay ba silay administratibong tulubagon.
Samtang nagpadayon ang proseso, gimandoan ang duha nga itugyan ang ilang mga lisensiya sa pagmaneho alang sa preventive suspension.
