CEBU CITY — Gihulagway ni Land Transportation Office (LTO)-7 Director Victor Caindec nga “fake news” ang pasangil mahitungod sa giingong korap nga sakop sa ilang buhatan.
Kini human nga, matud pa, mipakatap sa social media ang akusasyon gumikan sa giingong korap nga sakop sa LTO-7.
Gihimug-atan ni Caindec nga dili korap ang iyang mga empleyado sa buhatan sa LTO-7.
Matud ni Caindec nga usa lang ka demolition job ang post sa social media sa tinguha nga dauton ang iyang liderato.
Kahinumduman nga gisikop sa mga sakop sa LTO-7 niadtong buwan sa Hunyo human nga gituohang nag-fixing sa usa ka driver’s license application.
Hugot nga gibarugan ni Caindec nga nakigbatok ang LTO-7 sa mga fixers ilabi na kadtong buot nga makakuha og lisensya sa pagka-drayber.
Andam nga mopasaka og kasong cyberlibel si Caindec batok sa nagpakatap sa maong pasangil sa social media.
