Hugot nga ipatuman sa Land Transportation Office Region 7 ang kampanya batok sa mga sakyanan nga adunay non-compliant o modified mufflers sugod karong Lunes, Pebrero 23, 2026.
Sumala sa direktiba sa Assistant Secretary sa Land Transportation Office, tanang sakyanan nga makaplagang adunay ilegal o dili standard nga muffler dakpon ug silutan subay sa balaod.
Gipasidaan sa ahensya ang publiko nga dili magpadala sa mga sayop ug makalibog nga impormasyon nga gipakita sa pipila ka social media pages, vloggers, ug indibidwal nga nagtinguha lamang og likes, shares, ug views.
Matod pa sa LTO-7, samtang ang mga nagpakaylap og disinformation nagkaganansya sa online engagement, ang mga motorista maoy mag-atubang sa multa ug penalidad kung masakpan nga naglapas sa regulasyon.
Gidasig usab sa ahensya ang tanang motorista nga mokuha lamang og kasaligan nga impormasyon gikan sa opisyal nga tinubdan ug motuman sa balaod alang sa kaluwasan ug kahapsay sa kadalanan.
