CENTRAL VISAYAS- Mipasaka og kaso si Land Transportation Regional Director Glen Galario, batok sa iyang assistant director nga si Arturo Apolinar, sa Office of the Ombudsman-Visayas.
Gisang-at ni Regional Director Glenn Galario ang reklamo niadtong Huwebes, Septiyembre 11, 2025, nga nag-akusar kang Apolinar, og usurpation of authority, grave misconduct, ug mga kalapasan sa Anti-Graft and Corrupt Practices Act, kiini gumikan sa giingong dili awtorisadong pag-aprubar ni Apolinar sa usa ka multimillion-peso disposal transaction nga naglambigit sa mga na-impound nga mga sakyanan.
Sa iyang affidavit, si Galario miingon nga si Apolinar unilaterally mipirma ug miaprubar sa Notice of Award niadtong Pebrero 17, 2025, pabor sa E&J Scrap Metal Wholesaling, nga naglangkob sa pagbaligya sa 37 ka four-wheeled vehicles ug 114 ka motorsiklo sa kantidad nga P230,000, bisan pa sa mga pamaagi nga nagkinahanglan og pagtugot sa regional director.
Gihimug-atan ni Galario nga si Apolinar, isip chair sa Regional Disposal Committee, gitugutan lamang sa pagrekomendar sa mga aksyon ngadto sa direktor, apan pareho niining girekomendar ug gipirmahan ang award, nga gihulagway ni Galario nga tataw nga conflict of interest ug usurpation of authority.
Gihangyo usab ni Galario ang Ombudsman nga manubag si Apolinar sa mga kalapasan sa Section 3(e), Section 3(g), ug Section 3(i) sa Republic Act 3019, uban sa Article 177 sa Revised Penal Code.
Hinoun, wala pa moluwat og pamahayag si Apolinar sa maong reklamo.
Kahinumdoman, nga nalambigit siya kaniadto sa ilegal nga pag-tap sa tubig ug kuryente sa Motor Vehicle Inspection Center (MVIC) compound sa Mandaue City, diin ang mga linya sa utility giingong gi-divert ngadto sa usa ka pribadong insurance office.
