Gipahamtangan sa Land Transportation Office (LTO) og 90 ka adlaw nga preventive suspension sa lisensya ni Mikha Lim, usa ka miyembro sa P-pop girl group nga BINI, human siya nakit-an sa usa ka live video nga giingong naggamit og mobile phone samtang nagmaneho.
Makita sa video si Lim nga nag-rekord sa iyang kaugalingon samtang anaa sa lingkuranan sa driver, sa wala pa mahulog ang iyang mobile phone.
Makita usab sa recording ang iyang pagyukbo aron kuhaon ang maong device, ug dayon gikuptan kini gamit ang duha ka kamot samtang nagpadayon sa pagmaneho sa dalan.
Tungod niini, nag-isyu ang ahensya og “Show Cause Order” batok sa P-pop artist tungod sa posibleng paglapas sa Anti-Distracted Driving Act ug uban pang probisyon sa mga balaod trapiko sa nasud.
Midangop dayon si Mikha Lim sa LTO gahapong adlawa, human nag-isyu ang ahensya og *show-cause order* may kalabotan sa viral video niini.
Matod ni LTO Chief Assistant Secretary Markus Lacanilao, boluntaryong mitunga si Lim sa LTO—mas sayo pa sa iyang gitakdang pag-atubang karong Nobyembre 20—aron ipakita ang iyang maayong intensyon.
