CENTRAL VISAYAS- Opisyal nga gisugdan sa Land Transportation Office sa Central Visayas (LTO 7) ang Road Safety Month 2025, pinaagi sa grand motorcade ug opening ceremony sa Il Corso Lifemalls Grounds, South Road Properties (SRP), Cebu City, Lunes, Mayo 19, 2025.
Uban sa tema nga “Drive to Protect: Safe Streets, Safe Children,” ang usa ka semana nga obserbasyon nagtumong sa pagpataas sa kahibalo sa publiko sa kaluwasan sa kadalanan ug pagpalambo sa responsableng pagmaneho sa tibuok Metro Cebu.
Sa pakighinabi sa Bombo Newsteam kang Eduardo Montealto Jr., ang Regional Director sa Land Transportation Franchising and Regulatory Board (LTFRB) sa Central Visayas, gitino niini nga kining usa ka semana nga kalihokan, nagtumong sa pagpahinumdom sa mga drayber, nga gikinahanglan ang ilahang mga disiplina sa kaugalingon, kana gumikan kay mao kana ang hinungdan nga adunay disgrasya sa kadalanan ug dili ‘mechanical problem’ sa sakyanan.
Naglakip usab kini sa defensive driving seminars, educational materials, ug interactive learning sessions nga gitumong sa pagpauswag sa labi ka luwas nga mga dalan ug pagluwas sa mga kinabuhi.
Ang kalihokan giablihan uban sa flag rites ug usa ka programa, gisundan sa usa ka motorcade nga gisalmotan sa nagkalain-laing transport groups, driving schools, ug safety advocates.
Gikan sa Mayo 19 hangtod 23, 2025, ang Road Safety Fair sa Il Corso Mall adunay mga booth ug exhibit gikan sa LTO, transport sector, ug road safety groups.
Ang selebrasyon matapos sa Biyernes, Mayo 23, pinaagi sa Thanksgiving Mass ug programa sa alas 3 sa hapon, didto usab sa Il Corso Mall.
Ang LTO 7 nag-awhag sa publiko sa pag-apil sa mga kalihukan ug “Commit to Life” pinaagi sa pagka responsable ug safety-conscious sa mga road users.
