CEBU CITY — Girumbo sa Police Regional Office (PRO)-7 ang pinuy-anan sa mga Lumad minority atol sa rescue operations kaganihang udto sulod sa University of San Carlos Retreat House, Brgy. Talamban, dakbayan sa Sugbo.
Nasikop ang pito samtang na-rescue ang 21 ka mga menor de edad, diin pipila kanila ang nagdumili nga mo-uban sa otoridad.
Gihimakak sa lider sa maong minority nga si Datu Benito Bay-ao ang akusasyon diin giingong gigamit sila sa NPA aron malakip sa militanteng grupo.
Gisaysay ni Bay-ao nga niabot sila sa Sugbo niadtong 2019 human nga giingong giguba sa mga militar ang mga Lumad schools sa Talaingod, Davao del Norte.
Matud ni Bay-ao nga nihangyo sila sa mga namunuan sa maong tunghaan nga makapuyo una sa retreat house human nga naabtan sila og coronavirus lockdown.
Wala hinuon sila mibalik sa Mindanao gumikan sa kastrikto sa gikinahanglang mga rekisitos ug namahalan sa bayad alang sa pagpaubos sa swab test.
Sa wala pa ni-uban sa kapulisan, nihangyo si Bay-ao ngadtio sa kasamtangang administrasyon nga ihunong ang pagpang-atake sa mga Lumad schools ug tahuron ang ilang minoridad.
Anaa karon sa kustodiya sa DSWD ang 21 ka mga minor de edad samtang anaa karon sa police custody ang pito ka mga hamtong.
Samtang namahayag ang SVD Philippines Southern Province sa giluwatang statement nga andam silang mokooperar sa DSWD ug PNP alang sa pagsuta kabahin sa maong operasyon.
Sumala pa sa mga kaparian sa SVD, kinsang nidumala sa USC, nga mopahigayon sila og buwag nga imbestigasyon kung nganong daling nakasulod ang mga pulis sulod sa palibot sa tunghaan.
