CEBU CITY-Gi-donar sa usa ka pribadong indibidwal ang luna niini sa Barangay Adlaon ning dakbayan sa Sugbo aron sa pagpalapad sa Adlaon Police Community Precint nga ubos sa administrasyon sa Cebu City Police Office (CCPO).
Nahitabo ang paglagdaay sa CCPO Conference Room, Camp Sotero Cabahug, Gorordo Ave. ning dakbayan sa Sugbo kagahapong adlawa sa Biyernes, Nobyembre 22, 2024.
Gipangulohan kini ni CCPO City Director PCol. Antonietto Cañete uban sa ga sakop sa CCPO Command Group, ang Hepe sa Supply and Logistics division, kawani sa CCPO, PCP Adlaon Commander ug sa pamilyang Go nga gipangulohan ni Mrs. Paterna Go, kinsa donor sa maong luna.
Kini nga kalamboan nahimong mahinungdanon agig pagpalambo sa seguridad sa bukirang dapit sa dakbayan ingon man sa pormal nga paglada sa Deed of Donation aron sa paghatag og higayon nga mapalapad pa ang operational capabilities sa Adlaon Police Community Precint.
Ang Cebu City, isip highly urbanized area sa Central Visayas, adunay katungod sa gibana-bana nga 20 ka police stations ubos sa kasamtangang legal nga probisyon.
Sa pagkakaron, ang siyudad nag-operate ug 11 ka police stations, gidugangan sa duha ka community precincts nga nahimutang sa bukirang barangay sa Adlaon ug Malubog.
