PROVINCE OF CEBU-Gidili sa lungsod sa Barili ang pagpakaon ug lamaw sa mga binuhing baboy subay sa gihapon sa ilahang lakang nga malikayan ang African Swine Fever (ASF).
Matud pa, tangtangan ug permit ang baboyan nga masakpan nga nakalapas sa maong kamandoan.
Una niini, gitino ni Barili Mayor Pablo John Garcia IV nga mahimo sa gihapon nga maglapa ug baboy sa ilahang lungsod basta ipahigayon lang kini sulod sa ilahang tagsa-tagsa ka mga barangay.
Kini ang pagtataw sa mayor subay sa mga mikatap nga sayop nga impormasyon.
Sigon pa, kung magpalit ug baboy gikan sa lain nga barangay arun nga lapa-on, gikinahanglan pa ang pagkuha ug permit gikan sa barangay kung diin gikuha ang karne sa baboy.
Samtang, giawhag sa lokal nga kagamhanan sa lungsod ang mga nagbuhi ug baboy nga ipahibalo dayun kung ugaling mabantayan nga nagluya ang baboy arun nga daling masusi sa hingtungdan nga ahensya ug malikayan ang pagkatap sa ASF.
