CEBU – Napaslak sa prisohan ang usa ka chief of police human nga gipakatulog sa iyahang opisina ang usa ka dalaga nga drug suspect sulod sa tulo ka semana.
Giila ang nasikop nga si Police Major Edilfonso Miranda, ang chief of police sa Argao Police Station, samtang ang drug suspect mao si Jane Claudia Villanueva, 23 anyos, nga taga Barangay Kasay, lungsod sa Dalaguete, Cebu ug napriso human nasakmitan ug shabu sa gipahigayon nga buybust operation niadtong bulan sa Agosto sa nakalabay nga tuig.
Sa pakighinabi sa Bombo Radyo Cebu kang Police Staff Sergeant Roy Repolidon sa Argao PNP, gibutyag niini nga dako ang ilahang kakurat sa dihang gisikop ang ilahang hepe kagabii sa mga sakop sa Integrity Monitoring and Enforcement Group (IMEG), Regional Investigation and Detection Management Branch (RIDMB), ug Regional Special Operations Group (RSOG) sa Police Regional Office 7, kauban ang nahisgutang drug suspect.
Matud ni PSSg. Repolidon nga sukad nga nahimo nilang hepe si Police Major Miranda sulod sa tulo ka semana, giingong didto na usab sa opisina niini nagpabilin ang drug suspect inay nga sa ilahang detention cell.
Sigon pa nga wala usab sila masayod kung si kinsa ang naghatag ug impormasyon sa PRO 7 sa gibuhat sa ilahang hepe gumikan kay sila mismo ang mahadlok man nga musumbong.
Paghulagway pa sa naasoy nga desk officer, nga susamang usa ka Miss Universe ang kaanyag sa maong drug suspect ug giingong hilabihan pa kini ka-sexy diin bisan kinsang lalaki ang ma-ibog niini.
Samtang, gihimug-atan ni Cebu Provincial Police Office Director Police Colonel Roderick Mariano nga dako ang posibilidad nga matangtang sa serbisyo ang nahisgutang hepe gumikan sa paglapas sa ilahang protocol sa paghupot sa mga Persons Under Police Custody o PUPCs.
Sa pagkakarun, anaa na gikustodiya sa IMEG si Police Major Miranda, samtang gipahigayon ang imbestigasyon.
