Naghatag og emosyonal nga pasidungog sa iyang inahan nga si Catherine O’Hara ang bida sa Home Alone nga si Macaulay Culkin, sa usa ka Instagram post human namatay ang beteranong aktres sa edad nga 71 tungod sa mubo nga sakit.
Ang mga fans ug kaubang aktor nagbangotan sa pagkamatay ni Catherine, kinsa midala sa papel ni Kate McCallister, ang inahan sa karakter ni Macaulay nga si Kevin, sa mga pelikulang Home Alone (1990) ug Home Alone 2: Lost in New York (1992).
Sa iyang Instagram post, si Culkin misulat: “Mama. Abi nakog naa pa tay panahon. Gusto pa kog dugang… Gihigugma tika. Magkita ta puhon.”
Gawas sa Home Alone, si Catherine gihigugma usab sa bag-ong henerasyon sa mga tumatan-aw tungod sa iyang papel isip Moira Rose sa sikat nga serye sa TV nga Schitt’s Creek, nga midagan sulod sa unom ka season gikan sa 2015 hangtod 2020.
Mahinumduman nga niadtong 2023, nagkita pag-usab sila si Macaulay ug Catherine sa seremonya sa Hollywood Walk of Fame, diin gipasidunggan si Macaulay sa iyang kaugalingong bida.
Nihatag og mensahe si Catherine ug gidayeg ang aktor, nga nag-ingon nga ang kalampusan sa Home Alone tungod sa talento ug natural nga sense of humor ni Macaulay.
Sa iyang pakigpulong niadtong panahona, gihulagway ni Catherine si Macaulay isip usa ka matahum nga 10 anyos nga bata nga nakasagubang sa kabug-at sa kabantog sa bata pa nga edad.
Gitapos niya ang iyang mensahe pinaagi sa pag-ingon, “Gipasigarbo ko ikaw.”
Sumala ni Macaulay, bisan sa misunod nga mga tuig, gitawag gihapon niya si Catherine nga “Mom,” ug gitawag siya sa aktres nga “Son.”
Nihatag usab og pahasubo ang mga fans sa comment section sa post ni Macaulay, ug daghan ang nagpahayag og pasalamat sa handumanan ug mga kontribusyon ni Catherine O’Hara sa kalibutan sa pelikula ug telebisyon.
