CEBU CITY-Gisikop ang usa ka macho dancer pinaagi sa citizens’ arrest human nga giingong wala mo plete sa dihang nagpahatod kini sa Barangay Pasil gikan sa Cogon Ramos ug nanghuwam pa og kwarta sa habal-habal driver nga nagkantidad og P300.
Gidala sa habal-habal driver ug sa mga tanod ang iyang pasahero sa Abellana police station 2 aron ireklamo.
Ang suspek nga gitago lang sa ngalan nga “Junior”, nagpuyo sa dakbayan sa Lapu-Lapu.
Matod sa biktima nga si Jose Ruell Almendras nga misakay niya ang suspek nga si “Junior” sa Cogon Ramos ug nagpahatod sa Pasil apan inay bayran sa plete nanghuwam pa kini og kwarta kaniya ug misaad nga bayran inig balik.
Milanat ang pila ka minutos mibalik kini ug nagpahatod na usab pabalik sa Cogon Ramos ug misaad nga iyang bayran ang driver sa balor nga P600 apan pag-abot sa dapit diin siya nagpahatod iyaha kining gisingil sa bayad.
Giingong daghan na usab og pasumangil ang suspek ug tungod niini nangayo na siya’g pakitabang sa mga Barangay Tanod sa lugar.
Gitanggong karon sa Abellana police station 2 si “Junior” ug gitakdang pasakaan og kasong estafa.
