Gitay-og og 5.8 magnitude nga linog ang kadagatan sa Davao Occidental sayo ning Domingo sa buntag.
Sumala sa Philippine Institute of Volcanology and Seismology (Phivolcs), ang linog nahitabo mga alas 1:22 sa kaadlawon ning Pebrero 15, 2026.
Diin ang epicenter niini gibana-bana nga nahimutang sa 231 kilometros habagatan-sidlakan sa lungsod sa Jose Abad Santos.
Ang Phivolcs miingon nga ang linog tectonic ang gigikanan ug adunay giladmon nga 10 kilometros ilalom sa seabed, hinungdan nga kini mabati sa pipila ka duol nga mga lugar.
Bisan kusog, gilauman sa ahensya nga dili kini makahatag og dakong kadaot tungod kay nahimutang sa usa ka hilit nga bahin sa kadagatan.
Apan. nipasidaan ang Phivolcs nga posible ang mga aftershock, busa nagtambag sila sa publiko nga magpabiling alerto ug mosunod sa gipatuman nga mga protocol sa kaluwasan.
Gidugang sa ahensya nga ang pinakabag-o nga linog kabahin sa sunod-sunod nga kasarangan ngadto sa kusog nga mga linog nga natala bag-o lang sa Davao Occidental ug silingang Davao Oriental, mga lugar nga lakip sa mga aktibo nga tectonic zone sa nasud.
Padayon nga gibantayan sa mga awtoridad ang sitwasyon aron masiguro ang kaluwasan sa mga residente sa mga apektadong lugar.
