Cebu City-Mag-atubang og kasong reckless imprudence resulting in homicide and physical injury ug damage to property an drayber sa sports utility vehicle (SUV), human sa disgrasya nga nalambigit sa 5 ka sakyanan sa dalan Osmeña Boulevard niadtong Huwebes, Pebrero 8.
Kini human nga namatay ang drayber sa motorsiklo ug ang backrider niini nga giilang silang Marcelino Pepito ug ang iyang asawa nga si Marisa Pepito.
Gitino ni Police Major Jonathan Dela Cerna, ang hepe sa Traffic Enforcement Unit sa Cebu City Police Office, nga ang duha ka mga tawo gideklarar nga dead on arrival sa tambalanan.
Giila usab niini ang suspek nga si Marcelino Denila ang drayber sa Nissan Terra (F4B459) sports utility vehicle (SUV), kinsa misuway sa pag-overtake, apan nawad-an siya og kontrol sa iyang sakyanan, hinungdan nga nitipas sa karsada, ug nabangga sa ubang mga sakyanan.
Basi sa imbitigasyon nga nagbiyahe ang SUV paingon sa downtown area dihang unang nadasmagan niini ang usa ka public utility jeepney (PUJ).
Human niini, nibangga kini sa usa ka motorsiklo, ug laing PUJ.
Atol sa hitabo, ang duha ka PUJ ug Toyota Veloz padung sa uptown, samtang ang motor ug SUV paingon sa downtown area.
