Gipaubos karon sa subsob nga imbestigasyon sa PNP ang pagpamusil-patay sa magtiayong senior citizens sa sulod sa ilang panimalay sa Brgy. Bae, sa lungsod sa Sibonga, Cebu.
Patay sa maong krimen niadtong Enero 16 sa kaadlawon ang mga biktima nga silang Proferio Tolomia, 72 anyos, ug Anatalia Tolomia, 74 anyos.
Sa pasiunang imbestigasyon sa Sibonga PNP, misulod ang naka-maskara nga gunman sa panimalay sa magtiayon ug mipusil sa makadaghang higayon ang mga biktima.
Daling milayat pagawas sa panimalay ang mga apo sa biktima nga anaa sa 11 ngadto sa 19-anyos ang ilang mga pangidaron.
Samtang mitago usab ang laing 11-anyos nga apo sa ilawom sa higdaanan aron dili kini makita sa wala pa mailhing gunman.
Matud sa maong 11-anyos nga apo nga naningkamot kining mitago sa tumang kahadlok aron lang nga dili kini madamay sa maong krimen.
Nagkanayon si Police Major Alfredo Kuhay Jr., ang hepe sa Sibonga PNP nga mipahigayon na sila og follow up investigation aron masuta kung unsa man ang motibo sa maong krimen.
Nasayran nga namatay usab ang anak sa magtiayong Tolomia human gipusil niadtong Disyembre 16 sa nakalabay nga tuig.
Gipangita karon sa kapulisan ang responsable sa maong pagpamusil ubos sa hot pursuit operation.
