CEBU – Apo o mobayad og dul-an $650,000? Kini ang nahimong kondisyon sa magtiayon sa India human gireklamo sa korte ang ilang kaugalingong anak nga ilang gigastohan ang edukasyon, ingon man ang maluho nga kaminyuon.
Sa usa ka taho, giingong nahurot ang tigom sa magtiayong Sanjeev ug Sadhana Prasad sa pagpadako ug pag-edukar sa ilang anak.
Nasayran nga sila usab ang nigasto sa maluho nga kasal niini ingon man ang honeymoon apan wala gihapon kini makabaton og anak.
Karon, naningil na ang mga ginikanan gumikan unom na ka tuig nga minyo ang ilahang anak apan wala gihapon sila mahatagi og apo.
Isip kompensasyon o bayad nangayo ang magtiayon og 50 million rupees sa ilahang anak.
Kini gumikan gawas sa wala kini makahatag og apo, gigastohan niini ang pagpa-eskwela sa anak sa America aron mahimong pilot apan niuli sa India nga way trabaho.
Nagkanayon ang abogado sa magtiayon nga si Arvind Kumar nga dunggon sa korte ang petisyon karong Mayo 17.
