CARCAR CITY-Pabiling gawasnon ang usa ka Math Teacher sa usa ka tunghaan sa dakbayan sa Carcar human gireklamo kini sa pipila sa iyang mga estudyante nga nanghikap sa ilang mga pribadong parte sa lawas.
Matud pa ni Police Lieutenant Colonel Mark Gifter Sucalit ang hepe sa Carcar City police station, nga duha ka mga estudyante sa maong maestro nga nagpangedaron og 15-anyos ang nidangop ug nireklamo na sa kapulisan bahin sa nahitabo nila uban sa maong magtutudlo.
Ang usa ka 15-anyos nga usa ka grade-8 nga tinun-an nitug-an nga niadtong Hulyo 20,2023 human sa paniudto, gi-chatan kini sa maestro nga paadtoon sa eskwelahan bisan bakasyon na aron patabangon sa mga tiwasonon nga trabaho niini.
Nidugang kini nga adunay gipasuwat kaniya sud sa faculty room kauban ang maestro ug laing usa ka magtutudlo kansang lamisa nahimutang sa layo nga bahin gikan sa pwesto sa iyang maestro.
Samtang nagsuwat kini, nahibung nalang siya nga giingong kalit lang naghikap-hikap ang maestro sa iyang paa hangtod sa ubang bahin sa pribado niyang lawas. Wala na siya nakaagwanta niini hinungdan nga dali siyang nitindog ug nilakaw pagawas sa faculty room.
Nagtuo ang tinun-an nga kon wala pa siya molakaw niadtong higayona, posibleng lugoson na siya sa maong maestro.
Human nasayran sa iyang ginikanan ang nahitabong insidente, daling nagpatabang kini sa kapulisan ug desididong mopasaka og kaso batok sa maong maestro.
Samtang laing 15-anyos nga estudyante nitug-an usab nakasinati ug susamang pang nahitabo kaniya sa mga kamot sa maong maestro niadtong Marso 30,2023.
Nakahukom kining mosang-at na og kaso human giagni siya sa iyang maguwang nga babaye bahin sa nahitabong pag-abuso sa ilang maestro kaniya.
