CEBU CITY – Gipaslak sa karsel ang usa ka mahuyang ug kanhi call center agent human nga gisulayan niini nga magpalusut ug nubain nga gipasuk niini sa iyahang lubot sa dihang mibisita sa Cebu City Jail.
Giila ang suspek nga si April Jay Ajoc, ug residente sa B.Rodriguez St., Barangay Sambag 2, dakbayan sa Sugbo.
Sa pakighinabi sa Bombo Radyo kang Jail Supt. Renante Rubio, ang jail warden sa Cebu City Jail, gisaysay niini nga sa dihang mi-agi sa inspeksyon ang suspek, nabantayan sa jail guard nga adunay condom nga nagbitay sa may lubotan niini nga dali usab niining gipi-it gamit ang iyahang tudlo.
Matud ni Rubio nga susamang nag-muscle control pa kini gumikan kay bisan unsa-un pa nila ug patuwad, dili gayud mugawas ang mga kontrabando.
Subay niini, gidala si Ajoc sa Guadalupe City Jail ug didtu ilaha kining gipugus sa pagpagawas sa hugaw arun nga mugawas ang mga gipasuk niini nga nubain.
Human ang maong pagpagawas sa hugaw, nakuha ang 20 ka mga nubain nga gibutang pa sa condom.
Samtang, giangkun sa suspek nga iyaha ang mga nubain ug upat ka higayun na kini niya nga gibuhat apan karun wala na gayud siya makalusut.
Gipadayag niini nga aduna kini mga higala nga piniriso nga mangayu kaniya ug nubain ug miangkun usab kini nga mugamit usab niini sa higayun nga siya magluya.
Sa pagkakarun, gi-andam na sa kapulisan ang kaso nga ipasaka batuk sa suspek.
